Gal 2 | ASO | STEP | Neloti' kilisimasi fotini (14) ogo vavo Banabasikisi Zelusalemi numuno ebeta gohi dizo vusine' ve. Ido' dizo vusingu' nene Tito'nisi ele'mizo makato' vune' ve.

Galatians 2

Paulo' Aposolo Gono Daa' ine' Nemu' Aposolo Lingelite Gilavo Lamine' Ingumu' Lo-ngimine'

1 Neloti' kilisimasi fotini (14) ogo vavo Banabasikisi Zelusalemi numuno ebeta gohi dizo vusine' ve. Ido' dizo vusingu' nene Tito'nisi ele'mizo makato' vune' ve. 2 Ido' dizo vuvoni' nene haza dizo vamuve. O'moso'mo dizo vozo lo-nemavosa dizo vuvoni' ve. Ido' a'mida dizo vosa naza gono gomu' duvoni' nesi ido' gono idise noduvoni' nesi nene gopo soza inite' do minuvoni' gelalive losa Izesu' evenele guve'inesi ve minave engikovo' nene mulise mili minangu' nene a'mine gono daa' uvoni' monovo nene lo-ngimuvoni' ve. Ado' Zuda ve minamave heta ato' ve nene Kilisito'nimu' gamazi lamine' lo-ngemaa' nouvoni' nene ne'mine lo lo-ngemo ido' leli' Zuda veti monovo di ti' igi okodine lolovo huki hulilizave lo lo-ngemesa'muve lo a'mine lo-ngemaa' uvoni' gamazimu' nene lo soto' o-ngemekuve. Ne'mino lo soto' o-ngemekuvo ingine gilii lamine' ve lani' ve. 3 Ido' Zuda ve ma nete Tito'nimu' nene aza heta ato' ve nGiliki ve minine' nenako Mose' lou' gamazilo' e'meti oko'no lolovo huki huli-di Zuda ve lolo' i-dilizave lani'za Izesu' evenele guve'inesi ve nete gili ngimami Tito'nimukisi oko'no lolovo huki-dilizave lii ma li hukamani' ve. 4 Ido' a'mine Zuda ve nete Tito'ni oko'no lolovo huki huli-di Zuda ve lolo' i-dilizave lani' nene Mose' lou' gamazilo' gelekele' ogo a'mine'mi lulou' minunidoti' Izesu' Kilisito' aza evenele leli' do apase-lidine' nenako a'minemu' gilisa edamive li gili mo lamineto' nolihe li ningi gililisa ingine haleki suno' leli' vovoteu' igi gote izi Izesu' evenele minani' gili mini a'mine lou' gamazilo' gohi di gelekele' i-lidilizani' akamu' vise' igi minisa lani' ve. 5 Ee, ingine nete heta ato' ve nene oko'ine lolovo huki huli-ngidi Zuda ve lolo' i-ngidilizave li amuzo mili lani'za laza ingine Izesu'nimu' gamazi lamine' nene di gopo igi li-lingimikelizave lo a'mine gamazilo' gizebo lamine' okunivo gamazi gihile nene lamine' ha minelive lo engi' gamazilo' nene mo gele ngemamune. Ee, gamene ngomosi nene mo keke' gele ngemamo Tito'ni oko'no lolovo nene ma huko hulo-damune. 6 Ido' monoku' guve'inesi ve minani' gili minave ingine nene naza mono' gamazi lamine' lo-ngemaa' uvodo' nene gamazi ne'minesi imine' molo lo-ngemelesane li ma li-nimamani' ve. Ido' monoku' guve'inesi ve minani' gilivo minani' ve luve ingine nene mo guve'inesi ve minani' nolihe nani'mine ve minani' nolihe nemu' nene naza giluvo haza inite' lolo' ogave. O'moso ne'mo evene' ninge lamine' daa' neine' nene ingine dizi minangumu' ve losa ido' limi minangumu' ve losa ma nomive.

7 Ee, monoku' guve'inesi ve minani' nete gamazi ma ne'mino imine' molo lo-ngemeline li li-nidamani' ve. Asi monoku' evene' naba numuno langise ne'mini oti minave ve li li-ngidaa' ave Zakobo' ve Petolo' ve Zohane' ve nete lelikumu' nene lingine leli' daa' une' gono ma'mini daa' asive nene nizasive. Nemu' nene laza Zuda vetida mene gono nodunivo lingine nene heta ato' vetida vi gono dalisive li Banabasingisi adelo' dani' ve. Ido' ne'mine li adelo' dani' nene ti' li ningi gilani' nemu' adelo' dani' ve: Petolo' aza oko'ine lolovo huki hulaa' ave Zuda vela aposolo gono dangu' hize ele' o-daa' ive O'moso ne'mo naza heta ato' vetida gono do nouvongu' nene a'mine'mine ogo hize ele' o-nedaa' neine' nene soto' ogo minavo neloti' nene a'mine aposolo ingine Izesu'nimu' gamazi lamine' nene Zuda ve lo-ngemeline lo O'moso'mo Petolo'ni imiseline' ma'mino neze nene Zuda ve minamani' heta ato' vetida vo Izesu'nimu' gamazi lamine' nene lo-ngemeline lo O'moso'mo nimiseline' nemukisi ido' nasahili' o-nedo aposolo lolo' o-nidine' nemukisi nene ningi gilani' nenako nemu' nene heta ato' vetida vi gono dalizo li adelo' dani' ve. 10 Ingine gamazi gohi li-limami gamazi hamo' nene ti' li li-limani' ve: Lingine heta ato' vetida Izesu' aleve mono' li-ngimilisingu' nene ingine Zudaia misubouko goho' gahali' minave nene hize ele' i-ngidilizave li li-ngimilisingumu' nene gatine molamivoo. Ne'mine lani' nene naza mo ne'mine olosa amuzo molo minuvodo' lani' ve.

Adiokia Numuno Ebeta Minasingu' Paulo' Aza Petolo'ni Elemingumu' Line'

11 Ido' alinge' Petolo' aza neni' minuvoni' numuno ebe' Adiokiala ogosa a'mida inite' ma ogo molo minine' lisihe' amine' nene soto' ogavo nemu' nene naza neida vo lo soto' ogo elemuvoni' ve. 12 Ido' elemuvoni' nene ne'mine ogo molo miningumu' nene elemuvoni' ve: Aza nene a'mine Adiokiala ogo hetelo miningu' nene Izesu' evenele zuho mukiliti guvetesi ve Zakobo' aza Izesu' evenele Zuda ve linge ma ngimiselavo Adiokiala olihe igi hetelamavo Petelo' aza nene monovo lamine' apizo Izesu' evenele Zuda ve minamavesi nene gopo makato' noso' nite' naa' ani' ve. Aza monovo lamine' apizo ne'mine oga' ine'za Zelusalemi ebetati' Zakobo' ngimiselive ingine igi hetelikevo Petolo' aza nene ti' lo gelo golise giline': Zuda ve linge muki' nene engi' lou' gamazilo' amuzo mili gili mini ingine heta ato' ve gomu' oko'ine lolovo huki huli Zuda ve lili' igisavo' nene Izesu' evenele lili' ilisave laa' nave. Nemu' nene a'mine Zuda ve ingine nenikumu' nene gaza heta ato' vesi noso' nite' makato' nani' ne'mo nene Zuda ve leli' lou' gamazite nene avuto' ogane li nelemilizahe lo gelo golise giline'. Nemu' nene heta ato' vesi noso' nite' makato' naa' adoti' nene vo noka' mineka' ogo mino gohi vo namo hulo lamine' ine' ve. 13 Ido' a'mida Izesu' zuho Zuda ve linge ma nesi Zuda vemu' golise gilangumu' nene a'mine'mine igi monovo di goloso igi ingine lu'ningu' nene laza heta ato'vesi noso' nite' makato' naa' noune' nene lisihe' o neive li ha gili minani' nene di haleki heta ato' vesi makato' naa' ani' nene hulikevo ne'mo Banabasi' nesi engiku' vo gi'mizo a'mine monovolo' e'meto a'mine'mine ine' ve. 14 Ingine Izesu' zuho heta ato' ve minanikisi makato' noso' nite' naa' adoti' huli alamani' ne'mo Kilisito' gamazi lamineli'mi akau' lisihe' igi vamavo naza ningo Izesu' evenele linge mukiliti ve'nido' nene Petolo'ni ti' lo lo-imuve: Gaza nene Zuda veuti' soto' aine' mino Zuda veti monovo hulo heta ato' vela bizaa' anive neke nene heta ato' vela bizo noso' nite' makato' naa' adoti' hulo alamo minaine' ne'mo nene heta ato' ve ingine gilavo gomu' Zuda ve lolo' ikevosavo' nene laza Izesu' evenele Zuda ve minunekisi nene bizo minelesune laine' gelave. Nemu' nene heta ato' ve nene Zuda veti monovolo' ngele'mize molalosa iline' nene ngelo lisihe' ilihe lo lo-imuve.

O'moso'mo Zuda ve Do nGu' Izaa' Neine' Monovo Nene Ato' Nevoba Heta Ato' ve Kilisito'nimu' Gili Ele'vole' Ani' Ne'movo' Do nGu' Izaa' Neidi'mine Ogovo' Do nGu' Izaa' Neive Lo Paulo' Line'

15 Mo lamineto' laza nene Zuda ve minamani' heta ato' zuho Mose' lou' gamazi gilami gopo'napa minaa' aveuti' soto' une' nevoba Mose' lou' gamazi di minave Zuda veuti' soto' une' none'za 16 laza ti' lo gele none: Mose' lou' gamazilo' nene ngelo e'meto osu' lamolone' nenako a'mine lou' gamazilo' e'meto minelone' ne'mo do gamazite nomine' lolo' o-ledamo evene' hamokisi O'moso'mo do lu' izelido' do lisihe' gehepeve o-ledamoloseinako nemu' nene O'moso'mo evene' do lu' izelido' do lisihe' o-ledeline' nene lou' gamazilo' e'meti minangumu' ve losa nevoba ingine Izesu' Kilisito'nimu' gili ele'vole' angumu' ve losa do lu' izelido' do lisihe' o-ledeleseive. Nemu' nene laza lou' gamazilo' e'meto minune' ne'mo do lu' izelido' do lisihe' o-ledamivo Kilisito'nimu' gele ele'vole' olone' ne'movo' nene do lu' izelido' do lisihe' o-ledeleseive lo laza Zuda ve lingela nene Izesu' Kilisito'nimu' gele ele'vole' une' ve. 17 Ido' Kilisito'nimu' gele ele'vole' okunivo ne'movo' nene O'moso'mo do lu' izelido' do lisihe' o-ledeleseive lo gelo lou' gamazilo' e'metaa' akalo' vamune' ne'mo lazasi heta ato' ve ne'mine lou' avuto' oga' unive minune' gelavo nemu' Kilisito' aza nene evene' lihime daa' akalo' lele'mize molaa' ive neive lisa gililizaha o've mo keke' ne nomive. 18 Ido' lingine mo gili nizave. Petolo' aza heta ato' vesi noso' nite' ni minaa' adi'mo Zuda veti lou' gamazi nene mo hulo alamine' ve. Ido' alinge' heta ato' vesi noso' nite' maka' naa' ani' nene hulo haza minidi'mo a'mine gomu' hulokine' lou' gamazi nene gohi amuzo molalive lo gohi do oto e'metine' giline' ve. Ido' laza a'mine'mine ogo lou' gamazi'mi lulou' minaa' monovo mudise hulokune' nene gohi ma do oto e'metunidiniko laza lamine' mo lou' gamazi avuto' ogo lihime daa' unive minune' nene do soto' unidine. 19 Ido' ne'mine luvoni' nene nemu' luvoni' ve: Lou' gamazi nene ngenga lo gele damuvo a'mine ne'mo nebele hiline' gelavo ne'mo lou' gamazi'mi gesi mingu' minuvoni' nene osu' line'. Ido' osu' line' nene naza O'moso'mo lu'ne do ote-nede'mo vo minivo ei' lilidokovo' ezemu' gelo ogo molo minelove lo nemu' lou' gamazi'mi gesi mingu' nene gohi ma minamuvoni' ve. Kilisito'ni nene neni' lihime'nemu' lohoto' zalo' bilangu' nene nenikisi maka' nibili hilani' gelavo nouve. 20 Ne'mine ogo naza nene ve'nesi ha minevo' alevo' nouha Kilisito' ne'mo lu'neu' minevo' dovo' ogo minidi'mo nene nouve. Ido' idise me misubou' minevo' alevo' ogo nouvoni' nene O'moso'mi gipele aza lulo nemo nenikumu' lohoto' zalo' hilive eikumu' gele ele'vole' ogo nouve. 21 Ido' O'moso'mi lou' gamazi nene gele dokunivo lihimete nomine' minelonido' minidiniko Kilisito' nene hazamu' hilidine. Ne'mine idinako O'moso'mo nasahili' o-ledo Kilisito'ni imiselavo ogo lihimetemu' hiline' nemu' nene gele hulo naza Mose' lou' gamazilo' nene gele dosavo' lihime'ne nomine' minelesuve lamolosuve. Ne'mine ma oloni' nene O'moso'mo nasahili' o-ledo Kilisito'ni imiselavo lihimete nomivo minelone' akate vele-lidine' nene hazamu' vele-ledave lo mehe'ne imuvoni' geleleseinako nemu' nene mo keke' mehe'ne emamolosuve.